Tacón Gitano é flamenco, pero non un flamenco calquera, é a voz dun pobo, o pobo xitano; un pobo que soubo conservar ata os nosos días un xeito de vida e unha cultura propias e un pobo que expresa como ningún os seus sentimentos feitos música. As súas penas e as súas alegrías xa son patrimonio da humanidade e inundan case calquera recuncho do planeta con beleza e arte. Galicia non podía ser menos, e ten en Tacón Gitano embaixadores do mellor flamenco xitano: os Fernández e os Salazar. Dende os paus máis tradicionais ata os máis modernos danse cita nunha hora de espectáculo fresco, natural, sen máis pretensión que a de ser un mesmo; sen outro propósito que o de compartir o propio co espectador como farán ¡neste concerto en Riquela Club o domingo 26 de abril. Unha viaxe única, un deleite para os sentidos. Para a ocasión Tacón Gitano contará coa colaboración dunha guitarra de excepción, a do gaditano Miguel Flores, sinónimo de bo gusto e un dos artistas flamencos máis activos do panorama musical galego.
TACÓN GITANO
ISAÍAS SALAZAR baile
RUBÉN FERNÁNDEZ cante
MOISÉS FERNÁNDEZ percusión
MIGUEL FLORES guitarra (artista invitado)
Moisés Fernández debutou no flamenco con quince anos e dende daquela non parou de tocar compartindo escenario con artistas como Falete, Paquete, Marcos Teira ou Alejandro Vargas. Rubén Fernández é irmán de Moisés Fernández e ambos os dous son fillos do guitarrista Marchena, habitual do madrileño tablao Torres Bermejas; iniciouse no flamenco co piano, para despois namorarse da guitarra e do cante, converténdose nunha figura habitual nos escenarios flamencos de Galicia. Isaías Salazar xa de pequeno era chamado para bailar nas festas, chegando a compartir escenario con artistas como Duquende; a súa paixón é o flamenco e bebe das fontes máis clásicas deste arte, seguindo a escola dos Farruco.
Miguel Flores iniciouse no flamenco en Madrid, na academia Amor de Dios e no Conservatorio Casa Patas, onde entra en contacto con outros afeccionados e profesionais do flamenco, e ademais tomou clases con Aquilino Fernández “Entri” e, máis tarde, con Óscar Herrero. Ten participado, xunto á familia Serranito, no Festival Flamenco e na Peña Flamenca de Ceuta. Dende a súa chegada a Galicia non deixou de colaborar en diferentes proxectos musicais e artísticos que o levaron a compartir escenario con artistas como Narf, Guadi Galego, Iria Peña, Monica de Nut, Montse Rivera, Pablo Pérez, Carlos Freire, etc., formando parte de bandas como Miguel Flores Trío, Pesdelán, Mamá Cabra, Isaías Salazar Trío ou Kelibén.
+ MIGUEL FLORES
5€
(+ gastos) Puntos de venda:
Riquela
Comparte! Apertura de portas 19.30h
