Sinestesia celebra o aniversario da publicación do seu disco ¿Quién va a poder con esto? cun concerto especial en Riquela Club o venres 21 de abril no que contarán coa complicidade de músicos, e amigos, invitados. Sinestesia xúntanse por primeira vez en 2008 e a esencia do proxecto estivo moi clara dende o primeiro momento: letras coidadas, historias contadas a través dunha peneira de rock, blues e folk-rock americano, sen esquecer as tendencias máis actuais. Axiña emerxen como unha banda a ter en conta no circuíto galego tras gañar o primeiro premio do certame Música Xove 2008, éxito que os leva a moverse polos clubs galegos máis coñecidos e a facerse habituais na Rede Galega de Música ao Vivo. Publican 2 EPs antes da edición do seu primeiro longa duración, El punto de luz del desván, onde medios tempos e un ton contido, pero intenso, florece con intensidade. En abril de 2016 sae ao mercado o seu segundo longa duración, ¿Quién va a poder con esto?, cun son menos evidente e no que apuntes de blues e de jazz enriquecen as cancións; ¿Quién va a poder con esto? foi nomeado a mellor disco do ano en Galicia por Rocksoulthings e Rockbase. Sinestesia ten participado en festivais e ciclos como Atardecer no Gaiás, Feito a Man, Ribeiro Blues, etc.