SIMÓN GARCÍA QUARTET
PABLO AÑÓN saxofón alto
IAGO MOURIÑO teclado
SIMÓN GARCÍA contrabaixo
MIGUEL CABANA batería

Bassically é un proxecto do contrabaixista e compositor galego Simón García (Mugardos, 1977) no que este talentoso e emprendedor músico adapta pezas jazzísticas orixinais, escritas por el mesmo, que foron concibidas para grupo de contrabaixos ou grupo de contrabaixos e solistas. Toda esta música xa ten sido interpretada, nas súas versións orixinais, en diferentes países de Europa, Asia e América, pero nesta ocasión, Simón García xogará coa tímbrica e expresividade dun cuarteto de jazz. Este repertorio abrangue diferentes estilos musicais como o swing, o funk, a jazz ballade ou bossa nova e, para a ocasión contará cos membros do seu cuarteto: o saxofonista Pablo Añón, o pianista Iabo Mouriño e o baterista Miguel Cabana.
Tras máis dunha década de traxectoria profesional, boa parte dela desenvolta durante un periodo de sete anos en Madrid, PABLO AÑÓN (A Coruña, 1983) ten tocado en festivais, salas e clubes de toda España, Italia, Alemaña, Portugal ou o Congo. Na actualidade cursa o grao superior na especialidade de jazz e completa a súa formación en saxofón con Roberto Somoza. Ademais de ser membro de diferentes proxectos, ten conseguido distincións como o Premio ao Mellor Solista no Certame de Jazz Palma de Mallorca 2010, entre outros galardóns. Formado en música clásica no Conservatorio de Lalín, IAGO MOURIÑO continuou os seus estudos con diferentes mestres e no Conservatorio Superior de Música da Coruña. Lidera o Iago Mouriño Trio, no que fai visible a súa faciana como compostior, e forma parte de diversas formacións coas que actúa habitualmente en festivais de jazz de toda a península. Nado na Coruña no seo dunha familia de músicos en 1975, MIGUEL CABANA é licenciado en Jazz Performance con matrícula de honra na Guildhall School of Music and Drama londinense. Aos 15 anos de idade comezou a súa carreira profesional tocando en orquestras, bandas de rock, funk, pop, latin, folk, jazz, etc. En 1999 entrou a formar parte do profesorado da Escola Municipal de Música da Coruña como profesor de linguaxe musical, batería, percusión e combos. Na actualidade é endorser de baterías NPdrums (Nova Percusió), pratos Murat Diril, baquetas Morgan Mallets e caixas DMJDRUMS e compaxina a súa laboura como docente con diferentes proxectos musicais. Licenciado en contrabaixo polo Conservatorio Superior de Música de Castilla y León, o mugardés SIMÓN GARCÍA é un músico versátil que asiduamente é requirido para traballar con artistas de diferentes eidos musicais e artísticos. Cunha importante carreira internacional como intérprete e compositor, a súa música xa se ten interpretado en 26 países de Europa, América e Asia, tanto por el mesmo como por solistas de talla internacional. Regularmente ofrece clases maxistrais e concertos en diferentes países. Simón García mantén un contrato de exclusividade coa editorial inglesa Recital Music, coa que ten publicado máis de 40 partituras, e actualmente conta xa cunha discografía de máis de 30 títulos.