El mundo por montera é o título do segundo espectáculo en solitario do ovetense Rodrigo Cuevas que, en palabras do mesmo artista, supón “unha chamada de atención sarcástica en formato de zarzuela bufa. Feito dende Asturias e para o mundo. Un novo show no que amoso o meu universo: un mundo tradicional, rural, excéntrico pero, tamén, urbano, crítico e tecnolóxico”. El mundo por montera é un espectáculo onde hai folclore, música popular e gargallada, todo cosido con calidade musical e vocal por Rodrigo Cuevas, quen manifesta sobre a súa filosofía artística que “a miña busca é a verdadeira esencia, un traballo persoal levado ao escenario, unha exposición sincera para discernir o verdadeiramente importante do banal e prescindible”.

O primeiro álbum de Rodrigo Cuevas Yo soy la maga (2012) xa apuntaba algunhas das súas intencións sonoras e estéticas que ata hoxe seguiu explorando: posta ao día dun patrimonio cultural e musical extremadamente rico, o da música folk, o da tradición. Electrocuplé, espectáculo xocoso estreado en 2014 que fusiona cabaret, copla, burlesque e, sobre todo, canción tradicional asturiana travestida con música de baile, serviu para a consolidación de Rodrigo Cuevas tras ducias de actuacións. A súa fama non deixa de crecer e cóntanse por centos de miles as reproducións dalgunhas das súas aparicións en televisión e dos seus vídeos, entre os que salienta Verdiciu, un auténtico fenómeno viral. O seu máis recente lanzamento discográfico é o EP Prince of Verdiciu (Aris Música, 2016). O verán de 2016 estivo cheo de éxitos para Rodrigo Cuevas, con concertos memorables como o da Praza Maior de Xixón a rebentar con máis de 4500 persoas colapsando las rúas próximas e infinidade de actuacións en festas populares e en salas alternativas, en escenarios principais, en platós de televisión, en pequenas aldeas de toda Asturias e en cidades como Vigo, Salamanca, León, Santander, Madrid, Barcelona, Bilbao, Palma de Mallorca, etc. Rodrigo Cuevas está orgulloso de ter sido o embaixador da Sidra de Asturias con Denominación de Orixe Protexida en 2016; participou como mestre de cerimonias en galas de teatro (Premios Oh!), en foros sobre a Unión Europea, etc.; protagonizou o Día de América en Oviedo coa carroza que pechaba o desfile no espectáculo de rúa máis multitudinario de cantos se celebran en Asturias (máis de 250.000 persoas)… Campo y tablas, un documental sobre Rodrigo Cuevas que dirixen Manu García Postigo e Ojos de Hojalata foi recentemente estreado no Teatro Campoamor no marco do Festival SACO.

E agora chega o momento do novo espectáculo de Rodrigo Cuevas, El mundo por montera, que tras ser estreado a principios de marzo no xixonés Teatro de La Laboral, chegará a Compostela e a Riquela Club o venres 12 de maio. El mundo por montera mantén as constantes fundamentais que conforman a persoal achega de Rodrigo Cuevas que abrangue o humor, o etnoglamur, o erotismo, a diversidade musical máis heterodoxa e a posta en escena intransferible cun repertorio totalmente renovado, un vestiario de nova creación e un salto cualitativo en canto á factura profesional. ¡Ten nacido unha estrela!

Cómpre dicir que non hai antídoto nin neutralidade ante o maior tsunami que atravesa a música asturiana en moito tempo; o folk asturiano e, en xeral, a música asturiana necesitaban un revulsivo destas características. Rodrigo Cuevas propón unha revisión folk chea de bo humor cun discurso non casto, lúcido e sexy que nos fai rachar os límites da corrección. A súa música é synth folk, é tonada glam e é cabaré underprao; hai moito de sincretismo musical no seu abanico de sabores, de afluentes, de resonancias e de querenzas. Rodrigo Cuevas é un artista total; total porque a súa estrela brilla populista e por entre os arrabaldes da contracultura e total porque a súa autenticidade desenmascara a calquera tipo de impostura acadando a sensibilidade de todo tipo de públicos. Cantante, compositor, acordeonista e percusionista, a súa formación musical académica inclúe o grao medio de piano e estudos de tuba no conservatorio da súa cidade natal, ademais de tres anos de Sonoloxía en Barcelona.