“Johnny Cash lémbrame a loita dun home contra a tristura, a soedade e o pesimismo ou como fuxir de todo iso, pero tamén a busca da luz, a felicidade esquiva e os soños” (Toño López)

TOÑO LÓPEZ voz e percusión
OSCAR AVENDAÑO voz e guitarra
ANDRÉS CUNHA guitarra e coros
MAURO COMESAÑA batería e coros

Nado en Vigo, o nome de Toño López está ligado inevitablemente ao dá banda galega de rock&soul The Soul Jacket, na que é vocalista e parte da composición desde 2004. Con The Soul Jacket gravou 4 discos e percorreu os escenarios de gran parte do país convertíndose nunha banda referente no panorama nacional. De voz potente e agardentosa pódese dicir que a escola de Toño López é o blues, o soul e a música con alma e a golpe de escenario é onde forxou a súa voz e a súa personalidade. Tamén foi vocalista durante varios anos da Breogain Soul Band e de The Blackingstones, bandas residentes de varios locais de Vigo que versionaban clásicos do soul e o funk, mesmo se penetrou algunha que outra vez no terreo do jazz da man do guitarrista Javier Pena. De Toño López díxose: “é un fillo bastardo de Joe Cocker, un sobriño afastado de Van Morrison, un tipo de voz rota capaz de incendiar unha sala de concertos cunha música que se move entre o rock do sur do Mississippi, o blues rural e o soul de Alabama”, o que está claro é que ademais de con a súa voz exprésase coa alma cada vez que interpreta unha canción.

Oscar Avendaño leva tempo compaxinando a súa carreira en solitario ou á fronte de Los Profesionales coa súa carreira como baixista de Siniestro Total. Con estes últimos leva desde o ano 2001, pero sempre compartindo o seu tempo con infinidade de grupos, como Trem Pantasma ou Los Casanovas, ou outros proxectos como bandas sonoras para curtametraxes (o máis recente, Julia de Jose Aragunde) ou documentais (Novo Vigo Vello de Eduardo Rolland). A finais da pasada década é cando decide que ten suficientes cancións orfas de grupo e decide poñerse en marcha e gravalas, empezando así unha carreira en solitario que aínda continúa e coa que xa ten editados tres discos: Oscar Avendaño y Los Profesionales, Demasiado Oro y Burro (os tres con Folc Records). Este último foi gravado nos estudos Guitar Town de Hendrik Röver e co propio Hendrik como produtor e colaborador de luxo na maior parte dos 12 temas que compoñen o álbum. Na actualidade alterna concertos con banda con outros en acústico, mentres continúa xirando e gravando con Siniestro Total. Ademais, está a traballar nun novo álbum en solitario.

MEMORIA DE JOHNNY CASH

Froito da colaboración con Licor 43 e baixo o nome GINGER 43 LIVE, un dos fíos conductores da primeira programación de Nadal do novo Riquela Club é unha homenaxe a un dos músicos máis influíntes do século XX, o gran Johnny Cash, ao que dedicaremos tres sesións que protagonizarán músicos galegos de variados estilos e contrastada calidade como Martín Esturao (Mad Martin), Sabela King, Nestor Pardo, Antonio López, Óscar Avendaño…, artistas que sen dúbida proporcionarán unha enriquecedora achega para redescubrir a este mítico e xenial artista de intensa personalidade ao que resulta difícil poñer unha etiqueta e que é considerado un dos máximos expoñentes da música country. Toño López (vocalista de The Soul Jacket) e Oscar Avendaño (Los Profesionales, Siniestro Total) unirán as súas forzas no primeiro dos concertos deste ciclo “Memoria de Johnny Cash”, mentres que o coruñés Pardo será o protagonista do segundo e, no terceiro, contamos cunha especial colaboración para a ocasión, a de Sabela King y Mad Martin. É a primeira vez que se celebran todos estes conciertos, trátase dunhas propostas cuxo estrea absoluta terá lugar no Riquela Club durante estas dúas semanas previas ao Nadal 2016. A entrada para os tres concertos é gratuíta ata completar o aforo do local.