LONTRAS é unha banda viguesa formada por Juan Arca (guitarra, voz), Zalo Rodríguez (sintetizadores) e Sunil López (piano). As súas referencias suxiren sonoridades pouco exploradas na escena contemporánea galega, serpeando nun código sonoro no que se respiran ecos que van desde Chico Buarque ou Rodrigo Amarante a Wilco ou Boards of Canada. Así, o imaxinario estético de Lontras resoa como unha curiosa xénese na que o jazz, a indietrónica, a canción ibérica, a música clásica contemporánea e o pop alternativo máis maduro se dan a man. Nas súas cancións, as evocadoras letras combínanse con harmonías sofisticadas e unha produción preciosista e rica en detalles, construíndo verdadeiras paisaxes sonoras que estimulan a imaxinación dos seus oíntes.
