O guitarrista Virxilio da Silva comezou a súa formación no Seminario Permanente de Jazz de Pontevedra e posteriormente licenciouse na ESMAE (Oporto). Gravou o seu primeiro disco en trío en 2015 e en 2009 editou o seu primeiro traballo como lider, Odysseia, con Walter Smith III, Marcus Gilmore, Derek Nievergelt e Xan Campos. Ten colaborado en numerosas gravacións ao longo dos últimos 10 anos. Como final de programa do máster europeo EUJAM (Conservatorium de Ámsterdam, C Conservatoire Supérieur de Musique et Dance de París e Rhythmic Music Conservatory de Copenhague), Virxilio da Silva presentará os seus últimos traballos, froito destes dous anos de investigación e experimentación, que tiveron como resultado unha música cuxa influencia vai dende o rock psicodélico e ácido de finais dos anos sesenta ato o jazz, pasando polo pop de vangarda máis experimental, o noise e o stoner rock; unha música que ten como máxima a busca da liberdade máis alá da clasificación nun xénero determinado e que aspira, por enriba de todo, a manifestar a súa esencia subversiva.

VIRXILIO DA SILVA guitarra
ROSOLINO MARINELLO saxofón tenor
XAN CAMPOS Fender Rhodes
ALEX SALGUEIRO órgano Hammond
FELIX BARTH baixo
IAGO FERNÁNDEZ batería

RIQUELA, recentemente inaugurado (9 de setembro de 2016), está situado no casco vello de Santiago de Compostela, en concreto nonúmero 35 da rúa do Preguntoiro, un espazo que se abre á céntrica, fermosa e escenográfica praza compostelá de Feixoo e que esa dividido en dúas zonas diferenciadas tanto en horarios como en contidos: Riquela Bar e Riquela Club. RIQUELA BAR é un espazo acolledor e dinámico aberto dende as 11.30 da mañá ata a 1.00 da madrugada cunha suxerente oferta de carta de comidas e bebidas. RIQUELA CLUB é a esencia cultural do espazo, unha sala con capacidade para máis de 200 persoas onde gozar da música en vivo e unha gran variedade de espectáculos. A vocación de RIQUELA CLUB de converterse nunha nova referencia cultural para Compostela, cunha programación propia e confeccionada en colaboración con outros axentes culturais, festivais e promotoras de concertos, xa dou os seus primeiros exitosos pasos. Prestixiosos festivais como Outono Códax Festival, Wos Festival ou o Festival Internacional de Curtametraxes Curtocircuito xa escolleron o Riquela Club como espazo colaborador para as súas programacións.

Xa nas primeiras semanas de actividade, con dous concertos do compostelán Valentín Caamaño Trío, RIQUELA CLUB amosou o seu interese polo jazz como unha das liñas de programación que haberían de definir a súa oferta cultural. Esta intención se materializa agora neste ciclo RIQUELA 3&3 JAZZ, un certame que xurde froito da colaboración dunha destilería tamén santiaguesa, LA DESTILERÍA DE LAS IDEAS, e que nace vinculado en concreto á súa marca 3&3 PREMIUM GIN.

RIQUELA 3&3 JAZZ supón toda unha declaración de intencións de dúas iniciativas compostelás, do novo RIQUELA CLUB e de LA DESTILERÍA DE LAS IDEAS, na que é unha firme aposta polo jazz feito en Galicia. RIQUELA 3&3 JAZZ nace en forma dun ciclo de catro concertos que se desenvolverá durante os meses de novembro e decembro, unha primeira entrega que nace con vontade de converterse nun ciclo estable durante o próximo 2017 co respaldo dunha marca galega de calidade como a 3&3 PREMIUM GIN. Os protagonistas destes primeiros catro concertos, que se celebrarán 2 mércores e 2 domingos son Xacobe Martínez Antelo Trío (mércores 9 novembro), Andrés Rivas Jazz Trío (domingo 20 novembro), Felipe Villar Organ Trío (domingo 4 decembro) e, para rematar, o sexteto FUZZ que lidera o guitarrista Virxilio da Silva (mércores 14 decembro).

As localidades para estes concertos están á venda no RIQUELA a o ecónomico prezo de 6 euros (abono para os 4 concertos de 18 euros), e inclúen unha degustación de 3&3 PREMIUM GIN ou doutro producto de LA DESTILERÍA DE LAS IDEAS.