Felipe Villar Organ Trío é a nova formación do guitarrista vigués ao carón do organista Alex Salgueiro e do baterista Max Gómez. O trío de órgano, guitarra e bateria é un clásico na historia do jazz e, nos seus inicios, este trío explorará arranxos de dúas das súas grandes influencias, os tríos de Wes Montgomery e de Peter Bernstein, ademais de revisar composicións xa incluidas nos dous primeiros discos do Felipe Villar Trío. O guitarrista Felipe Villar (Vigo, 1976) é un dos músicos habituais da escena do jazz galego dos últimos anos. Na súa discografía como líder figuran dúas gravacións a trío: Home (2014) e Outro (2015). Ambos os discos recibiron moi boas críticas de prestixiosas publicacións como Zona de Jazz ou All About Jazz. O seu primeiro disco Home xa supuxo ao Felipe Villar Trío unha nominación como mellor grupo de jazz nos II Premios Martín Códax da Música. Felipe Villar tamén ten tocado e gravado con bandas como Alberto Vilas Quinteto, Rúa da Alegría, Fernando Sánchez Quartet, Esmae Big Band, Javier Marcos Trío, Antonio Otero Quartet, The Groove Project, Ten Jazz Men, etc., e ten actuado nalgúns dos principais festivais e locais de jazz de Galicia, España e Portugal: Festival de Jazz de Pontevedra, Festival de Jazz de Lugo, Nigranjazz, ImaxinaSons, Casa da Música (Oporto), Café el Despertar, Sunset Jazz Club, Xancarajazz, Jazz Filloa, Clavicembalo, Dado Dadá, etc.

FELIPE VILLAR ORGAN TRIO
FELIPE VILLAR guitarra
ALEX SALGUEIRO órgano Hammond
MAX GÓMEZ batería

RIQUELA, recentemente inaugurado (9 de setembro de 2016), está situado no casco vello de Santiago de Compostela, en concreto nonúmero 35 da rúa do Preguntoiro, un espazo que se abre á céntrica, fermosa e escenográfica praza compostelá de Feixoo e que esa dividido en dúas zonas diferenciadas tanto en horarios como en contidos: Riquela Bar e Riquela Club. RIQUELA BAR é un espazo acolledor e dinámico aberto dende as 11.30 da mañá ata a 1.00 da madrugada cunha suxerente oferta de carta de comidas e bebidas. RIQUELA CLUB é a esencia cultural do espazo, unha sala con capacidade para máis de 200 persoas onde gozar da música en vivo e unha gran variedade de espectáculos. A vocación de RIQUELA CLUB de converterse nunha nova referencia cultural para Compostela, cunha programación propia e confeccionada en colaboración con outros axentes culturais, festivais e promotoras de concertos, xa dou os seus primeiros exitosos pasos. Prestixiosos festivais como Outono Códax Festival, Wos Festival ou o Festival Internacional de Curtametraxes Curtocircuito xa escolleron o Riquela Club como espazo colaborador para as súas programacións.

Xa nas primeiras semanas de actividade, con dous concertos do compostelán Valentín Caamaño Trío, RIQUELA CLUB amosou o seu interese polo jazz como unha das liñas de programación que haberían de definir a súa oferta cultural. Esta intención se materializa agora neste ciclo RIQUELA 3&3 JAZZ, un certame que xurde froito da colaboración dunha destilería tamén santiaguesa, LA DESTILERÍA DE LAS IDEAS, e que nace vinculado en concreto á súa marca 3&3 PREMIUM GIN.

RIQUELA 3&3 JAZZ supón toda unha declaración de intencións de dúas iniciativas compostelás, do novo RIQUELA CLUB e de LA DESTILERÍA DE LAS IDEAS, na que é unha firme aposta polo jazz feito en Galicia. RIQUELA 3&3 JAZZ nace en forma dun ciclo de catro concertos que se desenvolverá durante os meses de novembro e decembro, unha primeira entrega que nace con vontade de converterse nun ciclo estable durante o próximo 2017 co respaldo dunha marca galega de calidade como a 3&3 PREMIUM GIN. Os protagonistas destes primeiros catro concertos, que se celebrarán 2 mércores e 2 domingos son Xacobe Martínez Antelo Trío (mércores 9 novembro), Andrés Rivas Jazz Trío (domingo 20 novembro), Felipe Villar Organ Trío (domingo 4 decembro) e, para rematar, o sexteto FUZZ que lidera o guitarrista Virxilio da Silva (mércores 14 decembro).

As localidades para estes concertos están á venda no RIQUELA a o ecónomico prezo de 6 euros (abono para os 4 concertos de 18 euros), e inclúen unha degustación de 3&3 PREMIUM GIN ou doutro producto de LA DESTILERÍA DE LAS IDEAS.