Un ano máis, Desconcierto Cultural continúa coa súa misión autoimposta de achegar ás comunidades veciñas de Asturias e Galicia a base de propostas musicais. A 4ª edición galega do festival PRIMOS HERMANOS o sábado 1 de abril terá como sedes, ademais do Riquela Club, a Casa das Crechas (sede do concertos de Pauline en la Playa, o grupo das irmás Álvarez que visita Galicia por primeira vez, e San Jerónimo) e o Embora Bar (sesión sidrina á hora do aperitivo amenizada por Catete Rococó). RIQUELA CLUB acollerá, para rematar a xornada o concerto de CAPTAINS.
CAPTAINS é a nova criatura de Fee Reega, asturiana de corazón e xermana de nacemento… (ou será á inversa?). Animal escénico e forza da natureza, Fee Reega paríu, xunto a David Baldo, Oskar SD e Aaron Dall, unha catártica proposta de dark-pop sinuoso e sensual, que fai equilibrios co spoken word, a electrónica e o post-punk. O seu directo furioso, atmosférico por momentos, bailable noutros, contén a promesa dun gran disco que está a piques de ver a luz. Unha revelación.
Partindo de fórmulas da música tradicional hispana como a jota, a rumba ou a muiñeira, LA BANDE consegue pezas pop de exquisito sabor fronteirizo. Percíbese a Calexico, en parte grazas a uns ventos dos que non prescinden no directo, ou ao primeiro Nacho Vegas; asoma tamén Dylan nunha colaxe da que facilmente poderían formar parte Fleet Foxes ou Leonard Cohen. Os textos enriquecen as cancións que forman Un cadáver exquisito, o seu segundo traballo discográfico, con narracións propias da novela negra; esta vea literaria ven marcada pola militancia dun dos seus membros no colectivo poético Patarrealismo Salvaxe.
http://www.primoshermanos.com
8€ (+ gastos) Puntos de venda:
entradium.com, Riquela Entradas
Comparte! Primos Hermanos | Desconcierto Cultural | Apertura de portas 21.00h
